森美樂園

超正的Rayban廣告

2010-08-31T11:15:00.002+08:00

Super Chameleon / RayBan / 2008 from Justin Harder on Vimeo.

三眼仔

2010-05-19T10:46:00.004+08:00

今日收到的新聞稿：

時代廣場為大家帶來「反斗奇兵@時代廣場」展覽，屆時將欣賞到「三眼仔入侵藝術界 – 當太空外星人碰上藝術人」藝術展覽，展出30位國際藝術家以人手繪畫、全新演繹的 art toy collectible (ATC)「三眼仔」figures……展場設計是一個放大版的安仔(Andy)房間，場內展出多位超巨型「反斗奇兵」英雄人物Figure，包括全球最大的巴斯光年巨型雕塑和三十隻三眼仔登陸於露天廣場，其中十隻三眼仔還備有特別音響裝置，當你和特定的三眼仔握手便會聽到十隻三眼仔一同和應的獨特的聲音，非常有趣；還有巨型胡迪、抱抱龍、彈弓狗和火腿於二樓大堂歡迎你，令你彷如走進玩具的國度。走進安仔床下底，還有迪士尼彼思動畫創作過程圖片及映像展。

展期由六月十七日開始，我要去影餐飽，但究竟我可唔可以同三眼仔握到手呢？

我要玩

2010-04-27T14:33:00.004+08:00

有得自製不同樣貌的三眼仔呀，快d出啦，我要玩！！！

煞科日

2010-04-15T14:34:00.003+08:00

今日是NBA常規賽煞科日，真是打到最尾一日先決定到十六隊的參賽資格，很緊湊，結果是以下對壘（紅色是我最期待收看的）：

東岸
騎士對公牛
魔術對山貓
鷹隊對公鹿
塞爾特人對熱火

西岸
湖人對雷霆
小馬對馬刺
太陽對拓荒者
金塊對爵士

今年有很多新面孔，總決賽會否再次上演夢幻戲碼「騎士vs湖人」，就要到六月初先知咯。

日本妹

2010-04-01T10:46:00.003+08:00

去完日本出trip，發現最得的都是日本妹……指的是日本的小朋友，她們的家長好像個個都是時裝專家一般，將小朋友的衣服襯得好靚好kawaii，花在她們身上的置裝費相信一定不少，真捨得！但就令我的日本旅程目不暇給，增加了不少樂趣。

妙麗

2010-01-07T11:34:00.004+08:00

2010年Burberry春裝依然用妙麗做代言人，依然是那麼靚。

手模

2009-09-23T18:40:00.002+08:00

公司同事要影相，需要一隻手入鏡既時候，我係第三個選擇，頭兩位都係女同事，兩位同事唔得閒時，就搵我埋位，今期書都用左我隻手，最好笑是拍照時，陽光好猛，有人幫我擔遮同埋撥涼，明星級招呼，勁正，哈哈！

睇到慶晒

2009-09-17T12:36:00.003+08:00

特首大大聲話推動本地科技產業發展，仲話係本地六大產業之一，睇完莫乃光寫的呢篇文（雖然是早幾個月的舊文），我覺得我地點夠鄰近國家如新加坡、南韓同埋馬來西亞爭呢？

香港數據中心「無地自容」
http://charlesmok.blogspot.com/2009/06/blog-post_22.html

十分十分期待

2009-07-23T15:32:00.001+08:00

微軟呃人

2009-05-29T18:11:00.004+08:00

微軟新廣告，話個女仔想搵份市場推廣工作，所以想買部US$1000以下既laptop，mac機太貴，唔岩佢用，所以買vista機……點知個廣告俾人踢爆，呢個係特約演員，唔係真case（詳情可click入這裡觀看），微軟想反撃Apple，點知愈做愈衰，唔知呢個世界自從有互聯網後，起底快得驚人，佢地梗係無睇過高登討論區喇。

菠蘿糖

2009-03-27T18:09:00.002+08:00

作為瘋狂菠蘿迷的我，差唔多有親菠蘿既野，我都想放入口，見到今期《飲食男女》推介這款菠蘿糖（圖左），連個包裝都係菠蘿樣，真係好想問來一試，但係賣成HK$39.9，有無離譜d呀，點買！

升降機廣告

2009-03-20T19:06:00.001+08:00

好正！

聾貓

2009-03-02T16:24:00.003+08:00

我的最愛，尤其係聾貓同阿闊既一幅，想睇晒所有原相，請到http://www.flickr.com/photos/postapoem/，好正！

小慧

2009-02-27T12:41:00.006+08:00

小慧依然咁靚，yeah！

氪氣石Nike Foamposite Lite

2009-02-23T11:59:00.004+08:00

如果真係出呢對鞋就好喇，勁想有一對，至少著住之後，5呎9吋的Nate Robinson可以跳過Dwight Howard入到樽，今年all star唯一好睇既一幕。

北跳岩企鵝

2009-01-16T14:37:00.002+08:00

摘自今日《蘋果日報》，我最喜愛的企鵝呀，原來一日唔見一百隻，好慘！

英屬小島企鵝每日失蹤 100 隻

英國海外領土聖海倫娜小島的兩個屬島，最大特色是有一大群可愛的北跳岩企鵝（ Rockhopper penguin ）。不過，企鵝仔近年以每天 100 隻的速度消失， 50 年來已不見了 200 萬隻，最棘手是原因不明，令保育人士擔心牠們步上絕種之路。
北跳岩企鵝因善於跳躍而得名，眼睛上方和耳朵兩側有豎起的金黃色翎毛，成年身長約 60 厘米， 80% 居於南大西洋聖海倫娜屬島特里斯坦達庫尼亞島及戈夫島上，最近數目神秘銳減 90% ，估計兩島總共只剩 144,000 至 230,000 隻。很多專家展開調查，始終找不出確切原因。保育生物學希爾頓相信，企鵝仔失蹤，跟海洋生態轉變、全球氣候變暖和過度捕魚有關。英國政府一直沒表態，近日才開會磋商，被保育人士指摘慢半拍，是北跳岩企鵝銳減的原因之一。

葉偉信

2008-12-30T14:28:00.003+08:00

今期壹仔訪問葉偉信導演，驚訝有人竟然同我既諗法好相近，好多做人處事既態度都好近，有成90%似，節錄其中一些訪問內容，真係好似。

．四十四歲，閱人不少，認為曾共患難才算朋友，信奉兩脅插刀酬知己，「同埋一齊學習，故稱同學；現在就算一起工作幾年，也只是同事。」
．「其實好簡單，愈珍惜生命，愈對生命有期望，便愈失望；愈想有朋友之間的信任，愈是得不到。」
．自問遵守遊戲規則，「我是天秤座，好講公道，最憎人搞事，我不會搞砸你，但你也不要扮Ｑ晒o野！」
．「我本來對人充滿希望，變成失望。」葉偉信說：「自此，人與人之間不信任，不喜歡交往，覺得人與人關係只是機緣巧合相遇，其實我好珍惜，想有好朋友，但投放太多，又驚……我充滿極端矛盾，做導演都是傻的。」
．「人生沒意義，我遵守遊戲規則，盡做，目的是過埋餘下的日子，不要欠世界太多，也不要讓世界欠我太多，你唔好搞我，我唔好搞你。」
．在他眼中，只有兩種人的人生有意義：出世就有幾十億家底，或者天才，「我跟你都只是輔助性生存，世上氧氣太多，我們幫手吸一些，然後排放二氧化碳出來。我有道理：出名的運動都是天才；有人說有錢未必快樂，但只是你不懂得找，為何有錢不比沒錢數？我真係解釋不到。」
．平均每年開一部戲，香港異數，「因為我負責任，叫好不如叫座。讚好其實不難，只要有心機拍，有些少獨特東西，怎會難睇？但要交代拍戲是商業行為，否則你便不是好導演。有些導演拍戲為了自瀆。自資拍戲，口碑好，我話你叻，但一定要票房不好，因為我要你承受自瀆的後果，精液滴在自己腳上。」
．出身貧窮的人都懂得居安思危，他一出糧便貯起全年租金，「我怕明日沒戲拍。導演其實無叻，唔拍戲就沒有生存技能。你知道現在有五十元剪髮？如果我識剪髮，三十元幫婆婆剪，甚至二十元；我做導演，難道說：『阿婆我幫你拍套o野？』」
．記者訪問過麥兆輝，他承認遷就大陸寫劇本，這天葉偉信附和，說得更盡：「梗係遷就大陸，梗係遷就香港；賣雲吞麵，梗係遷就食麵的人，難道遷就食屎的人？」
．若有路人故意踩他鞋，他會毆打對方直至氣絕身亡——在他幻想中，「我另一方面太理智，想到要坐監，便不會行動。我報復心好強，（幻想）對方一定要死，起碼也要屈斷他對腳；有人偷竊，我會拗斷他的手，總之一定要造成永久傷害。我絕對是天生殺人狂。」

AJ XX3

2008-12-23T11:04:00.004+08:00

AJ XX3

AJ Jumpman Elite 1

人人焦點都在AJ XX3，但一來香港未必有得賣，二來太貴，我反而喜歡新系列Jumpman Elite 1，因為有我最愛既北卡色，上次見到melo 1既時候，已經好鍾意呢個顏色配搭，不過鞋款唔靚，Jumpman Elite 1就好得多，但依然係好貴（這是至今仍未會買AJ的原因），應該唔會買啦，睇下都好。

面孔辨識把鬼

2008-12-03T14:20:00.005+08:00

之前有notebook加入面孔辨識（face recognition）功能，電腦會先用webcam紀錄使用者的面孔，以後電腦認到你本人個樣先開到機，以為好安全。今日cnet就刊登了一篇專訪，有越南電腦保安專家發現，只要在MSN或者skype中，用webcam記錄左機主個樣，然後在Photoshop做少少手腳（因保安理由，無披露詳情），用printer印出來，就可以拎住張紙對住電腦，成功呃到電腦開機，cnet記者仲即席用自己個樣試一次，真係可以呃到lenovo、toshiba同埋asus三部有面孔辨識功能的notebook，証明左都係傳統入密碼方法穩陣d。

原文連結：http://news.cnet.com/8301-17938_105-10110987-1.html?part=rss&tag=feed&subj=Crave

可愛bb

2008-11-25T17:53:00.003+08:00

好可愛的bb啊！（圖片來源：9gag.com）

小象與羊

2008-11-13T11:18:00.004+08:00

今日蘋果日報一則小新聞:

母象墮崖　小象纏上綿羊
南非野生動物園小象泰巴（ Themba ），母象墮崖死亡後，拒絕讓其他大象收養，卻纏上綿羊艾伯特（ Albert ）。只有半歲大的泰巴，體形比艾伯特大得多，卻老是跟艾伯特後面，用象鼻輕撫羊毛，艾伯特也模仿泰巴的動作，兩隻動物恍如兄弟般。
英國《每日郵報》

在網上找到相片,好溫馨啊!

一天都光晒

2008-11-07T15:44:00.005+08:00

無去加州紅唱k，都差唔多有大半年既時間，因為所有歌簽晒俾K-Net，要去酒吧先唱到，對於我呢d只去卡拉OK的人，點都唱唔到K-Net既新歌架喇，索性唔去。峰迴路轉，K-Net終於同加州紅達成協議，d新歌返晒去加州紅，好野，可以重新投入唱K活動（而且可以唔使去Neway喇），不過加州紅可以減下價，就最好啦！

AI

2008-11-06T09:58:00.003+08:00

圖片來源：NBA

一開季就有這麼大手交易，表面上睇，活塞以三換一，仲要換走比立斯，好似好搏，但三年來無乜變化，長此落去，盞年年打到東岸決賽就收手，就算打得低騎士，都打唔低我既愛隊塞爾特人，所以換AI係無可厚非，尤其係佢地防守已經好勁，加埋AI搶分，一定會好過之前既陣容，呢個亦係AI最後一個搶冠軍既機會，佢一定全力以赴，睇黎活塞奪冠機會又大增。
另一邊廂，金塊其實都係得益者，加入比立斯做指揮，少左AI同我勁鍾意既Camelo搶分，角色分配得好少少，可能打得更好，未致於可以持總冠軍，但總可以打破第一圈卦，拭目以待。

篆書

2008-08-29T11:55:00.003+08:00

一直以來，都覺得篆書好美，比行草隸更有美感，四四方方但筆劃清奇，連最近京奧標誌都用上篆書，感覺良好。買一本篆書字典不單困難，價錢亦很貴，幸好有互聯網，只要click到去這個「說文解字」網站，輸入單字後，就可以查出該單字意思及篆體寫法，雖然每次只可查單字，但查詢完畢後按「加入收藏」，就可將幾個字連成一幅圖，可以cap出來使用，試將「森美樂園」四字放入，就有以上的效果，再次証明上網真係乜野都搵到。

喜愛謝安琪

2008-08-27T11:56:00.002+08:00

請睇這篇文章：分析女子謝安琪

喜愛謝安琪，不單止因為她的聲音，而是因為她的姿態，香港有多幾個這樣有腦袋的歌手，就好了，可惜就算有，都未必有人懂得欣賞。

幾好波都假

2008-08-19T11:53:00.004+08:00

在友人blog見到hk-kicks.com有這樣的一篇文：

原文連結：http://www.hk-kicks.com/modules/newbb/viewtopic.php?mode=viewtopic&topic_id=168174&forum=15&start=220&viewmode=flat&order=1

澳門後數臭Lebron的Lebron Fans + Last Dance on HIM

對於星期5的USAB，自己覺得絕對係近來非常精彩的比賽!!! 舊年的CAVS對MAGIV，悶蛋，亦都係呢個原因，對今次的USAB並無太大其望，加上近年來，差唔多每一年都見到我支持的偶像LEBRON JAMES，但今次仲有11個其他球員，絕對係嘆為觀止 (雖然2年前係灣仔，CP3都有黎但當時佢仲未好好好出名)

買好USAB #6波衫，準時排定隊，算係一個小小FANS對你既支持，雖然每年鐘意LEBRON既程度都有明顯既下降，但我都會KEEP住買佢每一件波衫，留意佢每一樣野，但星期5，亦即係今次之後，我絕對唔會再儲LEBRON既任何野.....

事沿係當晚睇完波，去賭場玩兩手等船番香港，正當我將手上既籌碼羅去"唱"，我見到幾個超大份既人行出黎，先係WADE跟住MELO, PRINCE等等等等，當時係超興奮但真係黎唔切有反應，但WADE望住我件Tee，可能係因為有CAVS D人既花名係件衫上，佢經過我時同我講HEY MAN!!，而MELO我問佢羅個簽名，佢仲停低，幫我簽係張$500上面，但原來LEBRON已經走左去前面，我走去問佢可唔可以幫我係件USAB #6上簽個名，講真，當時我真係無諗過咩，都係搏一搏，但佢竟然話一句"FUCK OFF"，當時真係比唔切反應，又多人，但之後對呢條友絕對反感!!!!!!! 我著住你件波衫，唔係FANS係咩? 你趕住去打令就唔好行PUBLIC地方出去，行得呢度你就預左會有FANS問你羅簽名/影相，你估你係邊個？ Jordan都未會咁L吋，比你羅到更多RINGS時，你條友隻眼咪生係頭頂？

係對上2次你黎香港，大牌要所有人等你黎修頓，原來你仲係出面SHOPPING，黎到黑口黑面，求L其入球樽就已經好好咁，我本身對KOBE麻麻，但KOBE真係交足野比FANS，四萬咁口笑，絕對係NICE!!!!!

真係放長雙眼睇你NIKE份約滿你仲未有RING時，到時你D野仲有無人買，FANS唔係大晒，但無FANS你地食硬屎!!!

嘩，如果係真的，咁James幾好波都假，好在我鍾意既係KG，KG好人好多。

白金Hyperdunk

2008-07-31T14:53:00.002+08:00

今年最想要既波鞋，但係成千蚊，邊有錢買。

孤獨喬治

2008-07-23T12:15:00.004+08:00

除了肯亞，位於厄瓜多爾的加拉巴哥群島一直是我夢寐以求想去的地方，由十三個大平洋中的火山島組成的加拉巴哥群島，位於赤道附近，距離南美洲厄瓜多爾六百里，被厄瓜多爾列為國家公園保護。每個島都有獨特的地理景觀，充滿別處所沒有的奇珍異獸，包括藍腳的塘鵝、達爾文雀、紅嘴熱帶鳥、軍艦鳥、棕鵜鶘、加拉巴哥鵟、海獅、企鵝，同埋整個島躺滿海鬣蜥和陸鬣蜥，而且所有動物都唔怕人，可以近距離觀察，難怪達爾文於1835年拜訪該群島，蒐集觀察比較物種後，就寫成了進化論。
不過島上有一個焦點，就是一隻叫做「孤獨喬治（Lonely George）」的加拉巴哥象龜，話說當年西班牙人發現新大陸，黎到加拉巴哥群島，見到咁大隻象龜，行埋去佢地就即刻縮埋手手腳腳任你拎走，於是每次都捉幾百隻上船，得閒拎一隻出黎當杯麵食左佢，搞搞下全島既象龜死晒，死淨一隻，全世界就只剩低呢一隻，好在1971年被科學家發現，先保住佢條命仔，改名叫「孤獨喬治」，仲專登由其他地方帶來兩隻品種較相近的雌性象龜，希望喬治可以延續後代，但三十幾年黎完全唔成功，對兩隻母龜完全不愀不睬，今朝睇新聞，聽講終於成功交配，希望可以生到仔仔啦，唔係就真係會絕種架喇。

近距離見水巨蜥

2008-07-20T23:23:00.003+08:00

好開心！多謝olympus請我地去馬來西亞沙巴採訪，我想去沙巴好耐，唔係因為有好多水上活動玩，而係有水巨蜥，有幾巨，細過科莫多龍囉，但都好大條，兩至三米左右啦，但係可以近距離睇佢，科莫多龍就唔可以咁近喇。不過我行近時，本來唔可以郁的，但係咁岩腳痺郁左一下，條巨蜥就毫不客氣一條尾發落黎，好在係警告性的，唔多痛，但係就有一條少痕囉，但係見到佢地真係好開心，可惜晏晝落雨，唔係既話，仲可以見到犀鳥，一次過見晒兩種我最鍾意既動物，就真係開心死喇。

一年一度洗錢日

2008-07-18T17:10:00.000+08:00

書展見，yeah！

YouTube的威力

2008-07-10T15:40:00.002+08:00

如果沒有YouTube，這個在LA長大的24歲女孩子Marié Digby，只會繼續是個普通女子。但因為有YouTube，將自彈自唱片段放上去，吸引大量人次參觀，結果被唱片公司發掘，搖身一變成為創作歌手，你話，互聯網幾偉大。當然佢真係唱得好好，又識結他彈琴又識作歌，夠晒條件紅透國際樂壇。

Marié Digby網站
http://www.emimusic.com.tw/pop/mariedigby/
http://www.myspace.com/mariedigby

Kelstone

2008-07-08T16:27:00.002+08:00

上網睇到這個叫Kelstone的物體，07年比利時出品，根據人體工學做結他，唔使隻手長期拎住支柄，仲專登做到斜斜地，似足彈結他時個feel，而且可以兩隻手一齊彈，好得意。設計師Jan Van Kelst話想用佢黎取代舊式結他，不過就算產品有幾好用，總有死硬派話呢件唔係結他，想普及相信都有一定難度。

HyperDunk

2008-07-03T18:22:00.002+08:00

好期待，到底史上最輕、彈跳力最強的籃球鞋會係點樣既呢？香港開價過唔過千呢？香港會有乜野顏色推出呢？會唔會有易建聯版及中國版呢？一切有待七月底等Nike揭盅，好緊張啊！

好靚呀

2008-06-30T17:48:00.004+08:00

其實只係將舊時細個儲起的錄音帶（相信依家都無人聽喇卦）黏在一起，就有呢個超靚既燈罩效果。不過記得用低火數的燈膽，唔係就分分鐘會熱融晒所有錄音帶。

資料來源：http://www.unplggd.com/unplggd/lighting/
cassette-lamps-way-better-than-cd-lamps-054702

Starbury 3

2008-06-30T14:49:00.003+08:00

每年紐約人球星馬貝利都會用自己品牌出新鞋，前年推出第一代時，我自己就買過一對支持一下（只有水貨，香港沒有行貨），因為價錢好平，只是US$14.98。今年推出第三代（上圖），老實講，個樣真的不敢恭維，太土喇，點可以賣出街架？
不過兩個月前，已用超特價買了Adidas的TS ALL Star 2008（下圖），第一次幫襯Adidas（之前都是Nike的多），感覺居然幾好，著上腳居然沒有新鞋的不舒服，從來都未試過有這種感覺。但一落場鬥波，問題就來了，避震真的沒有Nike的好，依家成日rebound完落地，隻腳都受到好大回震，希望唔會太傷腳啦，下次都係買番Nike，或者希望Starbury第四代會好樣d。

令人失望的夢7

2008-06-25T12:36:00.003+08:00

奧運將至，尋日美國籃總終於公布國家隊最後名單，竟然只得懷特侯活一個中鋒！請問揀Jason Kidd、Michael Redd、Deron Williams同埋Chris Paul在同一隊有乜用？要是但兩個都夠照啦，仲要無Paul Pierce，今屆總決賽MVP呀，死啦，唔通好似上屆咁，今年依然無得奪金？

寫書

2008-06-23T17:28:00.003+08:00

身邊不乏作家朋友，每年寫幾本書，夠生活之餘又可以將興趣變成工作，令人羨慕不已。曾經幻想過無數次做作家，可惜一直只是幻想，年紀大了又不想犯險兼且要生活，做不成的多。不過有朝一日真的夢想成真，最想寫的還是一些較documentary的，當然不是悶兜兜的那些，而是想好一些有趣的題目，例如《中了六合彩頭獎會點使》，然後訪問一百個人，當然有少部分是你同我都識既、有少少名氣既人，再將他們的諗法匯集成文，應該幾有趣（我諗）。

終於贏了

2008-06-19T12:01:00.001+08:00

終於贏了，追了一整季，我鍾意了六年有多的KG，終於有冠軍指環，見到都感動。

超級豬肉運動會

2008-06-16T00:08:00.000+08:00

好搞笑，但係實在太貴，睇下好喇，阿輝真係愈黎愈搶鏡，但係我鍾意菇時多d播，蠢蠢地既樣先有春田花花特色嘛。

超可愛動物相

2008-06-13T12:17:00.001+08:00

太貴喇，買唔起，唯有在網上睇下，由出名攝影師Catherine Ledner操刀，總共有31幅不同動物的相，有興趣可按此睇睇。

點跳架？

2008-06-10T18:19:00.000+08:00

好驚人既彈跳力，點解咁都做得到？

若你下去讓我亦跳下去

2008-05-23T11:52:00.002+08:00

同一刻飛上天
同一刻跌下水
誰可以做情侶動作不一致又一對
要是你沒法起飛我亦會爭取
留在這泳池裡陪著你鴛鴦戲水

同一刻舉了手
同一刻踼著腿
泥沼裡暴潮裡仍共你形影不分一對
眼裡有彼此韻律也不需
憑一個默契陪著你舞翩翩跳下去

首歌旋律普通到不得了，但Wyman的詞起了點睛作用，每一次聽，都有點感動，紅色字那一句，是最喜歡的一句，細個讀書時，文化科有講「和而不同」的道理，不單做朋友要這樣，做情侶更需要這樣，生活才有情趣，感情才能久遠。

東西懸殊

2008-04-11T18:22:00.002+08:00

今年NBA，好精彩！開季先有塞軍連勝所向無敵，再有拓荒者異軍突起殺得性起，跟住季中有湖人買入加素有望坐穩西岸冠軍，再有火箭連勝破紀錄，估唔到季尾臨入季後賽前，小馬、金塊同埋勇力同分，要打餐死先決定邊兩隊入決賽，好睇到爆。

今朝終於勇士主場對金塊，生死戰，勇士贏既話就坐定粒六，點知都係金塊贏波，勇士要在餘下三場全勝，仲要金塊輸波，先有得入季後賽。無獨有偶，兩支球隊打法，都係有前無後，入分多失分亦多，一般球迷當然睇得開心，但係認真分析，就算邊一支入到季後賽，都係死路一條。不過我寧願兩隊入晒，都唔想再睇小馬，成季頹到無人有，季中買了傑特回來，又唔識得用，好在最近戰績反彈，先入到季後賽，但第一圈已經要對湖人，死梗。

不過就算金塊或勇士其中一隊要執包袱，都已經破左紀錄，成為史上「勝出最多場數而入不到季後賽」的球隊，好明顯，西岸的實力高得好緊要，之前已經睇過有人提議，季後賽根本不應分東西岸，應該兩岸一齊揀最好的十六強打playoff，我絕對贊成，睇住鷹隊得36勝42負都入到，根本失去左季後賽既意義，亦迫唔到東岸球隊打得起勁，惡性循環，如果兩岸成為一齊計，就唔會好似今年咁，要犧牲金塊或者勇士呢d好球隊。

抄野

2008-03-06T16:28:00.004+08:00

互聯網好偉大，但從事「創作」的人未必這樣認為。
因為以前抄外國野，唔會有人知，依家上網一search就知，你click下「香港好相似設計」呢個blog就知，結果那些標榜創意的名人，例如早前的林狗海報抄襲事件，好快就俾人刮出黎講，以前講到呢d人點勁點有創意，只係因為佢有錢買外國雜誌抄，而當時又未有互聯網而已。面對這些人，不要憤怒，不買票進場支持就是了。
上年年底，《志雲飯局》訪問黃子華，我無安裝那個收費台，無得睇，但網友轉述佢被問到同林狗比較有乜唔同時，佢答話好羨慕對方，因為佢有大批支持者，就算做乜都有大把人撐，相反自己做差少少，就會惹來大批人等劣評。言下之意，係對方是但做乜，就算亂抄一通都賣個滿堂紅，黃子華被人認為係勁人，只要稍為做得唔好，即使所有野都係原創，反而會惹來批評，話佢唔掂、走樣、無料，世事就是這樣吊詭，這亦是我最近聽到朋友話林狗好睇時，第一時間唔想回應既原因，免得同佢既支持者嗌交。
更令我覺得可惜的，是一個我認為頗為有料、有創意的A君，早前同手下開會，朋友剛好在現場，現場有人話未有idea，所以在外國雜誌東抄西抄用住先，原本以為A君一定開火罵人，點知反而話唔緊要，抄其實都係一個創意黎既，全場嘩然。但也沒法子，全香港也在抄嘛，抄既人先出到名，發到達，你可以唔抄嗎？

早日康復

2008-02-28T12:12:00.002+08:00

昨晚已收到這個壞消息，打不到NBA不要緊，參加不到08京奧才是問題，只希望你早日康復。

Life in Cold Blood

2008-02-12T16:15:00.001+08:00

我對爬蟲類情有獨鍾，平時睇國家地理雜誌及Discovery Channel時，遇有介紹爬蟲類的節目片段，實坐定睇晒，不過通常唔會多過一節，就已經轉去介紹其他動物。最近BBC居然製作了這套《Life in Cold Blood》，仲推出了DVD，淨係睇棘蜥受驚捲起變「棘波」，已值回票價，平時根本見唔到，DVD仲有製作特輯，好想買，唔知幾時香港先返貨。

排第一

2008-01-11T18:43:00.000+08:00

一直有玩開Facebook的NBA Fantasy，不過開季了幾個星期先開始玩，要急起直追，好在都唔係咁難玩，聖誕節平安夜那天，更奇蹟地以182分，成為當日七萬多個玩家中排第一的成績，好難得，即刻cap低這張相留念。原來當時總排名得17,937，依家我已經上到11,XXX，算係幾理想，不過今個星期表現麻麻，好多大熱倒灶的場面，尋日Baron Davis居然得8分，從未試過，希望唔會太影響排名啦。

Burger King重開

2007-12-21T09:48:00.000+08:00

好野，唔使去機場同埋山頂，去尖沙咀都有得食Burger King喇，快d開多幾間，等我可以去幫襯，唔使成日只係得Triple O's揀。

大難不死必有鑊粥

2007-12-18T15:48:00.000+08:00

N年前儲落的麥嘜扣章，隨章附送了一大堆好好笑的「一舊舊舊醒世格言」，我全部儲起晒，當中好多都好好笑，分享俾大家睇：

一日三揪
多勞多撻
情比金咭
聞雞起筷
不豬者畢飯
臀結實是力量
一理通拍你頭
肉不琢不成餅
教不賢豬之過
得鋤人處且鋤人
一串光陰一個撻
好漢不吃眼前撻
有情人終成扣肉
情人眼裏出豬兜
月亮代表我雞心
一豬還有一豬兜
多一事不如小一便
癩蛤蟆想吃豬頭肉
大難不死必有鑊粥
人無遠慮必有蛋撻
一言既出四個葡撻
有福同享有難葡撻
百年好合永結葡撻
學無前後滑者葡撻
一分豬頭一分孭鑊
從小便養成閱讀習慣
三人行必有一個豬頭
小過一次便算大過三次
讀萬卷書不如含萬里望
此處不頭痕自有頭痕處
留得青山在那怕沒葡撻
本來無一物何處食葡撻
天有不測之風雲人有霎時之蛋撻
人生自古誰無死留取丹心墊蛋撻
不在乎天長地久只介懷曾經碌藕
頂人雞心不可有防人豬踭不可無

大象鞋

2007-12-14T11:39:00.000+08:00

今日收到份新聞稿，好得意，係新加坡動物園兩隻象象Tun及Jamilah，早前跌親搞到隻腳有事，所以治療期間要訂造鞋給牠們著實，以防傷勢惡化，結果搞左成年先做到兩對鞋，點解？因為專家發現大象與人類的足部，不論在重量、平衡和行走方式均明顯不同，很難讓鞋子固定在腳上；而且當她們著得唔舒服，很快就會諗法子除左對鞋，經過多次試驗，先用GORE-TEX做到對靚鞋，你睇佢地著得幾開心！希望佢地快d好番啦，到時就唔使著鞋咁唔自然。

傳媒之友

2007-12-11T10:34:00.000+08:00

尋日同PR傾電話，八下有乜新產品可以做，gossip一下，講講下講到敝刊成日搵既某位專家，PR就即刻好慶，話那個所謂專家借佢地十幾萬product半年唔還，差d報警，還機時仲要態度惡劣，話部機好唔掂之類……其實一早都聽過，好多人話呢位專家唔掂，偏幫某些自己店鋪有售的牌子，踩低其他牌子，有時甚至試機時錯漏百出，不過我從未親眼見過，只係聽行家講，好難作準。
其實聽完晒所有傳聞，就算係100%真，我都會繼續搵該位專家，點解？因為在那個範疇有十幾個專家，但係打電話肯第一次時間回覆、每次約影相點影都肯配合既，就只有呢一位專家，其餘那些，不是時間難約，就是扮大牌唔理你，而且呢位專家不時會幫手度題目，仲要係俾好多建議那一種，就算佢唔叻，甚至係差，但係完全做到「傳媒之友」，我又唔係真係要個全行最叻既講野，我真係諗唔到原因，點解要唔搵佢。
有時行外人見到我地咁做，會覺得我地唔pro，甚至行家見到，都一樣係咁樣講，但係每份稿時間緊迫，只可在最緊絀既資源下做到最好，要話要罵由得你，批評人永遠比較容易。

易建聯掂

2007-11-05T16:00:00.000+08:00

老實講，入得公鹿，預左易建聯第一年的NBA生涯，都係打下常規賽就算，好難指望會有好突出成績，不過開季打左三場，又好似唔太差，頭兩仗作客，兼且未熟習NBA打法，預左打得唔好（第一場都其實打得唔差，只係受個犯影響），但到第三場已上手，居然有16分同埋8個籃板，這個數字很難想像是一個新人的表現，而且還是公鹿贏波的關鍵人物，比起姚明初登NBA，易建聯明顯搶眼得多。
尋日只睇左少少精華片段，只見到兩個易建聯的畫面，要睇晒成場先知佢真正既表現，但從數字上睇，明顯已控制到犯規的問題，無頭兩仗咁易俾對手假動作呃到，加上佢咁高既身形，卻有著驚人既速度，在NBA很少見，相信打多一排，好快就會有姚明既成就。

天下文章一大抄

2007-10-29T17:49:00.000+08:00

呢期興抄野，繼多本潮流週刊抄blog文抄上癮，當正係自己出品之後，連國際大企業都照抄。有網站發現Sony上星期推出的T2相機，其中一張公關官方發相，竟然與當年Apple出iPod nano時的發相一模一樣，我現場睇住五部T2，都未聯想到原來同iPod同一色系，依家睇返兩張相對照先知，咁都抄，Sony今次真係樣衰都爆。

Sony原相
Apple原相

Agloco賺錢

2007-10-10T11:29:00.000+08:00

之前同本地知名博客葉一知做訪問，除了講Google AdSense外，還講到Agloco，大家都覺得很神奇，唔使寫blog唔使做乜，上網時開著它的viewbar就得，為了寫好份稿（其實係自己想賺錢），即時join了試試。
不過參加後卻面對一個難題，就是Agloco好醒目，會限制你每個月就算上幾多網，最多都只count你頭五個小時，你上足幾百個小時都無用，因為佢要你用類似傳銷的手法，推薦Agloco給其他朋友做你的下線（不過Agloco和傳銷不同，過程是完全免費的），你先可以有較多的收入。當然難題是貿貿然你如何找到下線呢？email給朋友又好像很怪，將推薦連結放上forum或者blog中等人click又很渺茫，想來想去都沒有好的方法。
都話網上世界無奇不有，原來有網友在四月時發起，幫你免費拉下線，當然唔係完全沒有代價，不過就好簡單，只要在blog中介紹Agloco，並將網路賺錢四個字連到他的網站，就會將我的推薦連結放到「推薦連結亂數輪播器」上，等人add做我下線，好好玩，又好諗頭，當然第一時間試啦。不知幾時真的會有人做我的下線呢？發夢中……

〔P.S.當然如果有人看完這篇文，想賺少少錢，可以按這裡參加Agloco啊，費用全免，謝謝！〕

嘩嘩嘩嘩好多野

2007-10-09T15:48:00.000+08:00

每次聽到電視播，都好開心，最鍾意見到佢地。

示威

2007-10-08T17:06:00.000+08:00

剛從關島參加完家弟的婚禮回來，錯過了新聞，不知道尋日有撐普選的遊行，否則我一定參加。見到香港人遊行爭取普選，想起緬甸的人民，我們真的幸福百倍，至少上街遊行不用賠上性命。在關島時，繼續有睇電視留意緬甸的情況，有軍官日日奢殺人民頂唔順，出走外國兼爆料，話日日有僧人被殺，部分更是平民，而且是未死的平民，不是送到醫院，而是送到郊外埋左就算，連救也費事，令人髮指。
最可惡的，是大陸禁止中央台及鳳凰衛視播放緬甸消息，因為中國同緬甸關係多多，中間還有天然氣利益，所以一直不表態抨擊緬甸的做法，變相為緬甸軍政府撐腰，如果是事實，那真的很可怕。但願緬甸人民有自由的一天。

賭波

2007-09-25T12:39:00.000+08:00

香港人好奇怪。
同朋友食飯，成班人講股票，傾得興高采烈個個係專家，感覺像討論緊國家大事一樣咁高層次……但你同佢地講賭波，佢會話你係賭，甚至話你好爛賭，層次即刻低晒，咁佢地買股票，望住價位升唔升，今日賺唔賺到幾千蚊，唔通唔係賭？
再同另一些朋友食飯，又係一堆數字咁講，「隻454我$3買$4放架」，大佬呀，我真係唔知你講緊乜……到我講曼聯車路士，大家又再投以奇怪的目光，好似奇怪點解有人關心呢d咁小既事，全民皆股呀，講股票先係大事。
於是你去書店，投資書（我講得同馬經無分別，都係教人賭，可能會賭得理智d卦）放到周圍都係，我想睇既小說散文集，就要走到角落先搵到……在office唔敢睇波經，驚俾人話偷懶，搭車都唔敢睇，因為驚俾人話爛賭，但係朋友辦工時間睇股票機就無問題，上司仲八埋一份……你俾$60買「孖寶半全膽」中左幾千蚊叫好彩，佢地買幾千蚊股票又係贏幾千蚊叫做「識投資」，個個同事朋友仲當佢神咁拜，come on，呢個叫乜野道理。

好得意

2007-09-07T11:48:00.000+08:00

好得意，但係唔想食意粉屋，點算？

最失望的iPod

2007-09-06T15:19:00.000+08:00

打左呢份工七年，跟足蘋果產品七年，當年仲記得第一次出iPod，專登飛去美國聽Steve Jobs講解，仲送部iPod做禮物，變成第一個香港人擁有iPod，到依家都記得當時情景。咁多年黎，每次出iPod都係我跟，每次都總有驚喜，今次終於例外，我真係唔明，點解要買一部同iPhone一模一樣，但係平一點、薄一點，但又無電話功能的iPod Touch，至於新的iPod nano，得罪講句，好樣衰，最令人震驚的，是iPhone即日跌價US$200，吓！二線牌子就算產品賣唔去，都等半年後先減價促銷丫，iPhone賣左十個星期就減價，之前買左機既，咪全部都係笨X！同事話Steve Jobs做野無人明既，可能有佢既原因，對唔住，我今次真係唔明！

Yahoo!新功能（香港未出）

2007-08-28T12:35:00.000+08:00

上網睇到話Yahoo!出新功能，話可以email-to-SMS，即是上網用Yahoo!的電郵，就可以直接發手機短訊給朋友，正！不過可惜目前只有美國呀、印度呀等幾個國家有得用，香港未有，不過就算香港有，都唔知本地電訊商會唔會嘈，N年前ICQ可以咁做，已經嘈到拆天，後來仲ban左ICQ唔准咁做，梗係啦，SMS係佢地既主要收入來源嘛，希望今次Yahoo!搞得成啦，慳好多呀！

海豚音

2007-08-22T17:35:00.000+08:00

最近貪玩，不斷參加歌唱比賽，自知實力有限，見好多比賽唔使錢咪去玩下，順便見識一下高手的表現，發覺真係好多人唱歌好好聽，同埋在台上揮灑自如，比起時下很多所謂「歌星」高幾班。認識中的朋友亦有一些唱歌好聽的，那些人一唱，自己就會「毛管戙」，係是但唱一個音都好聽的，真的不知下了多少功夫。
最近睇YouTube，見到哈林上台灣電視節目教唱歌，現場表現「海豚音」（又叫做「泛音」，細個學physics好似學過），嘩，難到丫，學佢話齋，係比假音再高八度，我假音都未完全掌握好，點可以唱到呢個泛音，哈林不單止唱到，仲要好靚咁轉番個音落黎，勁到爆，終於知道點解以前有個朋友咁鍾意佢。有錢的話，我都要去再深造一下唱歌技巧，仲有好多野原來自己唔識，唉……

大假一週

2007-08-21T16:44:00.000+08:00

每年八月中，例牌放一星期大假，因為14號生日，19號拍拖週年紀念，放假慶祝最正。今年11號開始放，太后請去我最鍾意的動物園做生日禮物，去了番禺兩日，雖然之前都去過長隆一次，但今次去依然興奮，至少上次無得餵長頸鹿，我真的很想在動物園打工，日日見住動物就最開心。我仲記得上次黎，睇馬時佢自己行埋黎同我面貼面，不過今次時間唔夠，搵唔返隻馬，亦無睇到食蟻獸，可惜！
星期一回到香港，行了鴨寮街同埋黃金，唔知點解近來放假，這兩個地方都成了必去的蒲點。星期二生日正日，當然係去最鍾意既活動：唱k啦，原來仲有禮物收添，仲有蛋糕切，好開心。
星期三就去了東港城睇爬蟲展，同每年去上水睇既「花鳥蟲魚展覽」比較，呢個爬蟲展就好睇得多，以為自己已經見過好多種蜥蝪（蜥蝪話晒係我至愛嘛），點知當我見到成六米長既水巨蜥時，那種震撼真係難以形容。成個展覽係禁止影相的，我事前唔知，還帶了相機去，係有點失望，不過我去過「花鳥蟲魚展覽」，見到遊客用閃燈狂閃，工作人員點講都唔聽，我就寧願好似今次咁，唔俾人影相，至少唔會嚇驚各位蜥蝪朋友。不過由於無得影相，就行左差唔多成兩個鐘先走，真係唔多捨得。
星期四再去了多次鴨記，星期五一早就去搞美國簽証，因為家弟十月在關島結婚，去到見到方力申也在簽証，旁邊的人好似好熟口面……噢，原來是素顏的鄧麗欣，一早起身見到咁既樣，都真係……
星期日係紀念日，本來諗住睇IMAX版本的Harry Porter，可惜訂不到位，同埋都實在係太貴，結果去了AMC睇Simpsons，好正，笑死人喇，不過核電廠老闆咁少戲，真係始料之外，但都係一個好開心既紀念日。踏入第七年喇，希望妳會繼續開開心心在我身邊啦。

加flash game

2007-08-07T11:32:00.000+08:00

俾個類似鑽石方塊既game大家玩下，如果大家有寫blog，其實可以好似我咁，在sidebar入面加個flash game的（我加的是龜兔賽跑），方法係去日本Shockwave既blog game度登記（要睇簡單日文的，但係好易估到既），然後就會有一堆game俾你揀，揀岩再貼佢俾你既code就得架喇，好方便。

Simpsons扭蛋呀！

2007-08-02T11:04:00.000+08:00

繼早兩日在Bossini搵到Simpsons衫之後（好靚，賣HK$69咋），今日又有新發現，就係MegaBox搞全港首個最大型扭蛋騷，會有過千部扭蛋機及過百萬隻扭蛋的「Mega扭蛋鎮」，更引入全世界首十部八達通扭蛋機，仲有個扭蛋波波池（！）添……都唔係重點，重點在凡入場者均可以$10換購辛普森家庭手版公仔乙隻，最多可換一盒（共24隻），我收到新聞稿之後，睇埋張發相，嘩左一聲，好靚呀，但係MegaBox咁唔就腳，怕且都好難去到，唯有睇住張相先啦！

塞爾特人有救

2007-08-01T10:59:00.000+08:00

尋日已經有消息，話我頭號偶像KG會去塞軍，開頭都唔多開心，因為對塞爾特人一向無乜好感。今日終於証實左係事實，冷靜落黎諗下，又唔係播，如果好似當初咁講，KG去湖人，未必同高比仔拍得開心架播，而且成隊波就會淨係得佢地兩個打。依家去塞軍，除了有主力皮雅斯，仲有新加盟既阿倫，三個各有所長，而且互相無乜衝突，應該會好過我上年最有期望、但又令我最失望的AI+安東尼。

仲有一個好處，就是塞軍係東岸球隊，仲要位處大西洋分區，同區只有新澤西較有威脅，可以話係入硬playoff，好過留係西岸，咁多勁球隊，playoff條路都易行些。最緊要就係睇佢地對活塞、騎士同埋熱火時既表現，先知道佢地有無機會贏東岸冠軍。最開心係塞軍用五名球員換KG，真係識貨（當然可能只係考慮薪酬問題啦），亦顯出左KG既身價，聽到都開心；但亦帶來一個問題，就係三位主將年事已高，在唔夠後備既情況，萬一有人受傷，就好弊。好在KG仲好fit，近年好少受傷，希望佢來季可以keep住咁fit啦。
不過變左5號球衣，真係有些唔慣，咁亦都好明顯，adidas會好快幫KG出新鞋，因為舊型號全部有21號字樣嘛，唔知會唔會用返塞軍既綠白色做主色呢？

〔P.S. 占士大帝既新鞋真係好靚，有個金扣的，不過係低筒鞋，而且好貴（成$799），所以都係睇下好喇。〕

改名

2007-07-31T14:15:00.000+08:00

有些人很怕改名，或者寫小說寫劇本既，要成日幫角色起名，或者幫小朋友改名，或者幫自己改筆名……總之係改名啦，而又諗唔到要用乜野名，可以click上面那個網站，每次都會用中文字random砌一埋名俾你，任你揀，唔岩使可以再按「我要寫小說」那個掣，又有一堆新名用，包你改到。

見到自己

2007-07-30T17:35:00.000+08:00

在佢個blog度見到，工作時被人偷影了，同事們都話佢靚，我就覺得都靚，但就not my cup of tea啦，至於佢係邊個，賣個關子先，下期睇書咪知囉。乘機賣下廣告先，yeah！

Simpsons全家上雜誌

2007-07-27T19:33:00.000+08:00

在我心目中，呢期最紅唔係HP7，而係就黎上畫既Simpsons電影版，細細個已經鍾意睇佢既電視劇，未致於係fans，但次次都睇得好開心。今期著名時裝雜誌Bazaar仲將佢地全家放入內頁，畫到佢地著晒名牌時裝去巴黎，淨係開版相已經好正，套戲快d上啦，好期待！

港產設計贏獎

2007-07-27T12:43:00.000+08:00

見到呢個設計，又實用又得意，忍唔住post上黎，好過平時用既刨。

講起設計，剛剛公布的IDEA 2007設計大獎，香港人發明的One Touch罐頭刀贏了工業組大獎，再次証明香港人唔係「臘鴨」。

咁多色做乜？

2007-07-26T18:26:00.000+08:00

上網睇到，Toshiba將會推出新一代的Gigabeat MP3，居然一出就有廿四個色揀，當年Creative出十幾種色既喇叭同埋MP3已經夠誇張，依家仲要有24種色，其實係唔係真的有此需要呀？不過近年MP3市場已經俾iPod雄霸，其他廠商只有不斷諗其他綽頭應戰，好似Sony最近就話會推出檯燈連MP3機的Huna（！），其實唔知為乜，根本無諗過個市場需要甚麼，亂出一通，倒不如索性撤出MP3市場好過啦！

居然有攻略

2007-07-25T11:15:00.000+08:00

早幾日介紹了一個flash game，原來網上好多人玩，我幾經努力終於玩到15排，點知好多人都玩爆了，居然有人還將每一排的玩法錄成YouTube（！），當你真係諗唔到點過排時，可以click來一看，認真到不得了。再一次証明互聯網真係乜都有。

黃永玉在香港

2007-07-24T14:32:00.000+08:00

也不是甚麼新聞，其實十幾號開始，已經放了很多黃永玉的作品在Times Square，不過我這個九龍人，未有時間過海睇。最有趣當然是《阿當》、《夏娃》作品，但竟然又有人投訴不雅，真係俾香港人激死。
上次黃永玉畫展，第一時間去了藝術館看，我不是藝術家，當然不懂那些「將西洋畫風融入中國水墨畫」的高深理論，只覺得大師將生活常接觸到的事物，用不一樣的手法畫了出來，而且十分諧趣，成個畫展行完，你不會一絲沉悶，或是扮高深的感覺，看完令人心情愉快了不少。在壹集團返工的其中一個好處，就是常常可以免費看到黃永玉的作品，等車時更可坐在他造的椅子上（有他親筆簽名的），屈埋屈埋一日返工既悶氣，在這一刻唔見晒。

哈利波特外洩

2007-07-20T14:40:00.000+08:00

7月21日，全球哈利迷的大日子，因為結局第七集終於推出。千算萬算，保安十級嚴密，還是有人預先拎到第七集的書在手。據估計，約有千分之一（即約1,200本）新書，「錯誤地」送到消費者手中，原因是某些較小型的書商，想仿傚大書商在21日當天將書寄給讀者，但卻在計算郵遞時間時出錯，結果書本早到，令不少人可以先睹為快。有少量獲厚待的讀者更想公諸同好，將整本書逐頁用數碼相機拍下，製成一個73MB的PDF檔案，供人BT下載。老實說，就算有這個檔案，我也不想看，用數碼相機拍的影像，縮小放在PDF中，我相信看多一會就已經頭暈，而且亦不知道那是否真的正版新書，內容是否真確，倒不如等到21日開售才看真正的小說吧！（註：如果真的想先睹為快，可以在The Pirate Bay中搜索「Harry Potter Deathly Hallows」找種子的。）

書展與麥兜

2007-07-19T15:00:00.000+08:00

年年書展，總會入去行一圈，但近年已開始行多過買，今年更加不想行。新聞話今年有六千本新書，但我相信「掛名作家」、「明星作家」寫的多，要買新書平時行書店也見到，很多新書已脫離了書展才推出的傳統，那些將在書展推介的「新書」，我上星期在大眾書局已經見到，就算真的是書展先有得賣的，下星期也可在書局買到，行書展的動力減少了很多。另一方面，香港出版的書可讀性亦不高，外來（包括台灣及內地的）的書籍更好看，就連雜誌也是內地做得更好（認真慚愧），這些書本雜誌不會因為書展而來，行書展的意義真的不大。

以往行書展的另一原因，是麥兜，因為一定有新產品推出，真的是「唔買都睇下」，結果雖然都是睇的居多（因為實在太貴），但也頗有趣，見到成個攤位擺滿麥兜同阿闊，的確幾開心。可惜近年麥兜精品質素同創意都一般，但價錢依然高企，加上近年識人拎會場精品，又有多間McQuarter專門店開張（還是懷念活道那一間舊店），去書展迫餐飽睇的衝動又減少了，真的找不到要行書展的原因。

搣泡泡紙

2007-07-18T10:48:00.000+08:00

由細到大，我都鍾意玩泡泡紙，一有在手，就誓要將所有泡泡搣爆為止，如果未有泡泡紙在手，可玩住呢個flash game頂住癮先，雖然毫無手感可言，但至少有少少聲音聽下，都幾好玩。

超難玩

2007-07-17T11:58:00.000+08:00

有無人可以玩到爆機呢？我玩到第二排已經束手無策，好用腦的一個Flash Game。〔最新消息：玩到第五排就搞唔掂。〕

易建聯登錄NBA

2007-06-29T16:59:00.000+08:00

繼姚明後，易建聯是另一個「較有睇頭」、由中國登錄NBA的球員，今朝選秀會塵埃落定，易建聯會入公鹿打波，雖然未知會否擔任正選，不過公鹿上季28勝54負，東岸中央組包尾，除了Michael Redd及Andrew Bogut外，其他都不算名氣太大，加入易建聯當然是好事，不過同組有東岸冠軍騎士、大前年冠軍活塞，以及實力極強的公牛，公鹿想發圍不是易事。不過Nike有理無理，已經簽了易建聯，波都未打已經有一大堆產品推出，大概是當年簽不到姚明，今次不可再放過一個靠中國熱賺錢的機會吧！
對於易建聯，其實期望不會太大，始終NBA不是CBA，幾叻的球員都有可能給比下去。反而令人興奮的，是盛傳我最最最鍾意的偶像Kevin Garnett，有機會跳槽去湖人，同高比仔並肩作戰，實在是一個超好的消息，如果屬實，下年睇NBA就會更開心，當然我更希望KG拍Leborn James，拎總冠軍的機會就更大。

馬貝利的貢獻

2007-04-05T14:01:00.000+08:00

今日回到公司打開報紙，睇體育版時留意到一則小新聞，說NBA球星紐約人控衛馬貝利在美國自行找鞋廠，創立自家的品牌Starbury，專賣平價而優質的籃球鞋，每對只售US$14.98，話要與那些大廠明星貴波鞋抗衡。
嘩！不得了，對於喜愛籃球鞋、每次要花六、七百元買一對新鞋的我，這對二百蚊有找的Starbury，簡直是從天而降的恩物，即刻入google搜索一下，看看鞋款是否很醜樣，誰知居然不是，與一向穿著的Nike相若，但平一大截，可惜在美國先買到，香港暫時未有得賣，慘！個人對馬貝利本來沒有任何好感，甚至因為他終日口出狂言兼無甚表現而反感，今次算加返不少分數。只希望Starbury捱得住（過往紀錄，球星自行出波鞋全部執笠收場），當然香港有得賣，更好！

賞櫻

2007-04-02T12:43:00.000+08:00

假期前夕，上星期一直忙趕稿，雖然復活節要返工，但稿照趕，趕到氣咳。其實上星期日（3月27號）趕稿前，偷閒去了長洲賞櫻，只是一直都未有時間寫blog講下。可惜生平第一次見櫻花小姐，她卻害羞非常，大部分只得枝沒有花，很難得先影到幾朵，有點掃興。太后聽遊人講，前年櫻花開得燦爛，上年已開得差了，今年更差，大概是因為天氣太早轉熱。下年要早一點來，看看會否有櫻花海出現。

蛋蛋連環圖

2007-03-16T15:46:00.000+08:00

家中兩貓，只有蛋蛋肯合作坐定定俾我影相，另一成員歡歡，仍然無法出現在我的鏡頭內，女仔都係害羞一點，希望下次可以post歡歡的相啦！

動物方塊

2007-02-25T16:41:00.000+08:00

永遠是最簡單的遊戲耐玩，最近見到人在nds中玩「動物方塊」，回家即找網上版來玩，只是很簡單的一個遊戲，但卻好玩非常，大家也玩玩吧！不過有無人知道nds既版本叫甚麼名字？我在網上找不到有地方可以下載啊！
-----> http://www.cces.mlc.edu.tw/xoops/file/zookeeper.swf

原始的統治

2007-02-01T12:24:00.000+08:00

廣管局向港台發出「強烈勸諭」，不該鼓吹「同性婚姻」，我沒有看那一集節目，但看了那麼多年《鏗鏘集》，很難相信這個節目有偏向某一方意見的可能，用幾個同性戀例子，去探討一下社會這方面的問題，想不出有甚麼令人「不安」的成份，而且做我們記者這一行的，已習慣了用個案來輔助報導，如果這樣會有問題的話，傳媒（尤其是電視台）還敢去探討所謂敏感的話題嗎？社會的小數聲音，還夠膽去給他們發聲嗎？一收到投訴就「勸喻」，廣管局是怎麼搞的？
老實說，環顧中港台三地，香港以先進自居，但觀念卻是最最最保守的，香港人心靈真的如此脆弱嗎？區區一個同性戀話題已接受不來？甚至播了廿年，《秋天的童話》那些用以反映人物性格所說的「仆街」「躝癱」的粗話（有點懷疑還有沒有人說「躝癱」）也接受不了？香港人直情有病。
不單廣管局，其他政府部門作風如出一轍。拿禁煙為例，就算我本身不是煙民，亦頗憎吸入二手煙，也不應將它一刀切用家長式管治全面禁絕，餐廳負責人至少有權利選擇，我的餐廳是禁煙的，還是開放給煙民的，然後市民就會有選擇，怕煙的自然會走去禁煙的餐廳，你說立法是為了保障香港人的健康，煙民想尋找快樂不理健康，干聊何事？如果說是為了健康，干脆當成毒品禁賣啦，甚至應該立例禁酒，酒對身體的損傷，比香煙中尼古丁影響身體健康有更多的數據支持。
引用蔡瀾專欄中一段：「當年請大家別亂拋垃圾，也只用一雙嚴厲的眼睛來作宣傳，這多漂亮；發展成一隻垃圾蟲來警告，形態已經猥褻。等到成為罰款，就變成一種原始的統治。」香港社會及政府，明顯在倒退中。

報佳音

2007-01-05T10:34:00.000+08:00

網絡大塞車，連寫blog的心機也沒有，聖誕節太后出遊，空閒到死過了一個lonely christmas，但就有時間做一件咁大個仔從來都未做過的事：報佳音，還要係當街當巷那種，和未來特首候選人梁家傑一齊唱了兩小時，原來都幾好玩，係唱完有點累，考眼力時間：大家在相片找到我嗎？估中沒獎，哈哈！

實用程式

2006-12-18T18:37:00.000+08:00

太后話，有朋友寫支票想寫英文時，銀碼太大未必識寫，在網上找到一段Javascript，可以輕易解決呢個問題，日後如果大家有同樣問題，請按以下網址：
-----> http://sammypoon.sinaman.com/test.htm

錯過了添

2006-11-30T10:53:00.000+08:00

嘩，今日收新聞稿，先知有個咁既記者會，錯過了兩個可愛的小朋友呀，好在有相send俾返我，即刻save低佢，呵呵！

今年最精彩的演唱會

2006-10-09T17:14:00.000+08:00

對唔住，Eason，今年唔係你添。
講緊既係尋晚梁漢文演唱會，真係好睇到喊，七年喇，七年先來一個演唱會，Edmond好有火，明顯係show hand之作，唱《艦隊》做開頭，其實唔係幾吸引，但係即刻有《不願一個人》，仲要有《一世一次戀愛》同埋《我需要的只是愛》（我其中一首最愛），即刻ok晒，幾驚佢唔唱華星歌。唱左大半粒鐘，嘩，死喇，Eason做嘉賓，佢彈琴伴奏俾Eason唱《浮誇》，好聽過我年頭聽佢在concert唱那次，我即刻嗌到失控。跟住千嬅出埋黎，「華星三寶」齊晒，一齊唱《大激想》，學Edmond話齋，真係「歷史時刻」，錯過左呢世人都未必可以再聽第二次，實在太太太興奮。
中段有鄭中基加方力申加周師傅，玩「美女廚房」，仲叫周師傅唱「夏季不不不」，我個人不特別喜歡，但係都幾開心。跟住《666》、《性情中人》、《我的太太》（居然有呢首，呵呵！）、《披頭四》、《一小時沖印》、《八里公路》……全部歌都識唱識背，同埋好好聽，死喇，咁快到壓軸歌既，咁當然係唱《纏綿遊戲》啦，但係我仲有好多歌想聽播，點解仲未有《衣櫃裡的男人》、《傷了三個心》，同埋《好朋友》架，一邊嗌encore，一邊心裡邊祈禱，三首歌是但一首係encore既歌都好丫。
點知encore時段，七部琴升起來，嘩，即係會唱七首歌啦，點都中三首裡面其中一首卦，結果原來只係唱六首，因為其中一部琴係古董琴，超過一百年歷史，蕭邦都彈過，全世界只得兩部，所以呢部唔可以大力咁彈，結果輕輕彈左蕭邦既《小夜曲》同埋陳百強既《連漪》，Edmond話一早已經諗過，一開演唱會就要將全世界最好既琴帶來彈一次做表演，好有心思……六首歌，頭兩首係《501》同埋《重新做人》，我都好鍾意，但係未係心水，結果第四首係《傷了三個心》，yes！第五首係《衣櫃裡的男人》，於願足矣。最尾一首會係……心裡再祈禱，結果……真係《好朋友》呀，我聽到想喊，Edmond唱到尾亦喊左出黎，最尾再加多首《七友》，好完滿咁結束。
貪心d，仲有好多歌想聽，例如《我的命運》、《PG家長指引》、《普通朋友》、《星火》、《呼吸》、《聽說你愛我》、《流離夜雨雨中花》……不過當然係無辦法唱到咁多，仲有蘇康可以落黎唱兩咀，我會更加癲，可惜只係在panel同Edmond吹了幾句水就算，噢！但點都好，一定係今年我最鍾意既concert，無計！

P.S. 點解今日睇報紙，話有第二次encore架，仲要係《愛與情》；點解中間首Medley會有《呼吸》，我聽唔到播，點解會咁架？

中秋節快樂

2006-10-07T14:52:00.000+08:00

中秋節，人月兩團圓，第六個中秋節了，新幹線燈籠亦陪了我們四年，希望我、你、新幹線這個組合，年年不變。

接收工

2006-09-29T18:54:00.000+08:00

尋晚尖沙咀海旁試相機，要試到八點幾，結果唯有叫太后來接我收工，很少機會由她來接我收工，做做下野見到佢突然出現在身邊，仲要係佢搵到我（尖咀海旁都幾大播），超級驚喜。海旁行得多，未試過留影，既然有咁多相機，梗係叫攝影師立即代為影一張，超級靚靚，yeah！

動植物公園

2006-09-18T16:44:00.000+08:00

星期日，沒有甚麼特別節目，就和太后同埋太后細妹去了我最愛去的動植物公園……沒錯呀，就是在中環的那個動植物公園呀，每年總去一、兩次的，因為在香港已沒有甚麼地方可以看到動物嘛（我最鍾意就是看動物，好過在鬧市看一堆堆的人呀），加上今年有很多小動物在園中誕生，當然要去探探牠們啦！
結果出現了兩件意料之外的事情，一是美州虎居然生猛地行來行去，因為記得之前幾次來，牠都在睡呢，今次很難得見到牠動，不過真的很肥，肚腩都走出來了，大概是太好食好住吧！第二件驚喜事，是在「爬蟲屋」中居然養了一條小鱷魚，唉呀，不用入濕地公園都看到鱷魚，真的很驚喜，立即幫牠拍照留念。
除了動植物公園，推介多一個地方給大家，就是在屯門市中心的屯門公園（相連西鐵站的），那裡沒有動物園，但就有一個爬蟲館，有很多靚靚的爬蟲類，還有超大隻的陸龜，和動植物公園一樣是免費的，假期沒事做，不妨一去。

愛得太遲

2006-09-07T12:09:00.000+08:00

唱了幾年硬假音，今年的古巨基，終於回歸自然，變回久違了、令人懷念及喜歡的古巨基，第一plug「花灑」已經超鍾意，依家既「愛得太遲」更正，唱k唱了幾次，幾次都有少少感動，當然林夕的詞亦居功不少，但可能年紀大，聽返呢類旋律簡單好聽的，反而覺得窩心，唔係下下都要hip-hop+rap，尾音仲要拖多幾個wo同埋yeah死唔斷氣先係好聽，始終市場太多R&B，聽到「愛得太遲」咁clean既，反而覺得好fresh，不過相信依家批後生仔未必會buy……只希望首歌唔會似當年「愛與誠」，播到你煩，播到你唔想聽就好喇。

愛得太遲

歌手：古巨基 | 作曲：楊鎮邦＠宇宙大爆炸
填詞：林夕 | 編曲：雷頌德

我過去　那死黨　早晚共對　各也紮職以後沒法暢聚
而終於　相約到　但無言共對　疏淡如水
日夜做　見爸爸　剛好想呻　卻霎眼看出他多了皺紋
而他的蒼老感　是從來未覺　太內疚擔心

最心痛是　愛得太遲　有些心意　不可等某個日子
盲目地發奮　忙忙忙其實自私
夢中也習慣　有壓力要我得志

最可怕是　愛需要及時　只差一秒　心聲都已變歷史
忙極亦放肆　見我愛見的相知
要抱要吻要怎麼也好　偏要推說等下一次

我也覺　我體質　彷似下降　看了症得到是別要太忙
而影碟　都掃光　但從來未看　因有事趕
日夜做　儲的錢　都應該夠　到聖誕正好講跟我白頭
誰知她開了口　未能挨下去　已恨我很久

錯失太易　愛得太遲　我怎想到　她忍不到那日子
盲目地發奮　忙忙忙從來未知
幸福會掠過　再也沒法說鍾意

愛一個字　也需要及時　只差一秒　心聲都已變歷史
為何未放肆　見我愛見的相知
要抱要吻要怎麼也好　不要相信一切有下次

相擁我所愛又花幾多秒
這幾秒　能夠做到又有多少
未算少　足夠遺憾忘掉

多少抱憾　多少過路人　太懂估計　卻不懂愛錫自身
人人在發奮　想起他朝都興奮
但今晚未過　你要過也很吸引

縱不信運　你不過是人　理想很遠　愛於咫尺卻在等
來日別操心　趁你有能力開心
世界有太多東西發生　不要等到天上俯瞰

南丫島兩日一夜自由行

2006-08-21T12:51:00.000+08:00

週年紀念，決定了去南丫島玩，雖然行程諸多不順，黑仔事件亦頗多，但整體來說，玩得超開心，尤其是去了想睇好耐的風力發電站（但行錯路俾人話，aiya），仲食埋山水豆腐花（睇下太后食得幾開心），但係夜晚去食海鮮，就貴得離譜，差唔多每人三百幾蚊，下次打死都唔去食。上山睇發電站途中，聽到途人話好似成個旺角搬左去南丫島咁，我都覺得係，無計啦，只得星期六日有假期去離島玩，將就一下啦！

新床舖

2006-07-26T11:45:00.000+08:00

想換床舖好耐，結果星期六終於換左，多謝太后慷慨捐出冒險樂園積分（其實九成係我俾錢玩既），換左呢套靚靚床單連被袋連枕頭套，仲親眼目睹太后極速九秒九換床單法，勁！終於有覺好訓，不過如果圖案係三眼仔就更好，嘻嘻！

上網開檯

2006-06-14T16:04:00.000+08:00

最近迷上去Yahoo!打網上麻雀，雖然有時好慢（唔知點解我部機load Java會咁慢既……雖然讀書時代已知Java寫出來的程式好鬼慢），但係好好玩，如果有friend一齊玩仲正，可以在ICQ中「打籠通」，笑死！我個ID係「sammypoon2001」，晚上十二時後就online玩，有興趣請坐落黎過返兩招。

再感動

2006-04-26T15:16:00.000+08:00

出左喇，3CD三十八首歌，再聽都係咁感動，一播起《浮誇》，即刻諗起開場的畫面，一路聽落去，每播一首歌，腦內就播返睇演唱會的畫面，好正！快些出K碟，好多歌K都未有得唱（尤其是《怪物》，因係Medley的關係，依家的K版只有半首），好想去K由第一首唱到最後一首，唱到氣咳先盡興。

小吵是福

2006-04-13T16:23:00.000+08:00

今日讀報，讀到專欄中李牧童寫的一篇文，很認同啊，這兩個月學曉的就是這件事（當然做不做到又是另一回事），男士們最好讀一讀，多加警惕：

兩性大不同，男人令女人不解，甚至感到恐懼的行為所在多有，其中一項，是在思想與言行上出現嚴重時差。
一年多前的某天，因為故友從外地回來旅行，她整晚沒有回家睡覺，第二天直接上班，當時她的丈夫沒有表示不滿，直至年多後的今天，兩人因別的事情發生爭吵，他忽然扯到舊事上去，以鐵證如山的口吻，痛斥她從來沒理會他的感受。
令她驚詫的，不是因為他舊事重提，兩口子吵架少不免搬出新仇舊恨；令她感到心寒的，是在她的印象中，他從沒為那件事不滿過──原來在四百多天以來他一直耿耿於懷，原來他一直在隱瞞，原來她根本不認識他。同床共寢，咫尺千里，這感覺的確十分恐怖，思緒延伸，到底平日對我笑的他，在心是否在笑？他一臉溫柔地吻我，轉身後是否一臉厭惡？我以為的愛，會否已成了一廂情願？
這種不動聲色的情變，如同屍變。
有這麼恐怖嗎？是想得太多了吧。
並非要為他洗脫罪名，我只是想為男人作出合理的辯護，減輕罪名。
男人做事比女人講求成效，若預計徒勞無功，男人很可能會索性不說。開口了，也許會按不下脾氣，把事情搞得更糟。開口了，若對方態度依舊，難免有失威嚴。「谷埋谷埋，一下子爆發」，大部分男人在性格上都有此趨向，不是存心欺瞞，笑藏刀，只是忍得就忍，然後忍無可忍。小病是福，小吵也是福，真的感到不滿，別怕婆媽，還是說出來比較好。
2006年04月13日　李牧童

永遠懷念

2006-04-01T00:24:00.000+08:00

三年了，不知不覺，但還像是昨天發生似的。
很記得那一天，還在尖沙咀吃飯，飯店中有電視，新聞題要正正報導這一件事，我想，不是真的，是玩笑吧，是同名同姓吧，誰知……第二日的《蘋果日報》，頭版我還keep到現在，辦公室貼的，依然是哥哥的海報。
靈堂沒有去，因為要開工，在canteen食飯時，想到要開工而去不到見最後一面，突然崩潰嚎哭，嚇怕了同事……之後兩年，都沒有參加在文華酒店門外舉行的紀念活動，自己心底仍接受不了這件事，更試過長時間在K唱《左右手》時，就哭……
講起《左右手》，記起初戀女友，她是哥哥的死硬fans（與她比較，我不算很死硬），姐姐是譚校長fans，她會毫不留情與姐姐鬥咀，拒絕聽譚伯的歌（當然大個後就沒有那麼執著，兩位歌手都合唱過啦），《左右手》最初也是在她家聽CD聽到的（不知道三年前她的心情是怎樣的呢），之後分開了，就自己買碟來聽，後來也喜歡過另一個哥哥的fans，甚至追過一個校長的死硬fans（當然沒有在一起啦），哥哥就是這樣的在感情生活中穿插。
今年，沒有文華聚會，改了在星光大道，心情也平復了不少，可以去參加了吧；但今早搭公司車時，聽到收音機播《左右手》，心情又忐忑了，不理了，還是8:30準時去到，遲多幾年，可能逢這些活動都沒有，想去也沒機會。

購物

2006-03-28T00:45:00.000+08:00

很久前用匯豐信用卡的積分，換了張商務印書館的五十蚊coupon，昨天終於的起心肝用了它，去到書局，經過一輪篩選，最後只剩下兩本書，一本是Wyman的《俗》，出了好一段日子，另一本是陳慧的《小事情》，剛於上月出版的，後者剛剛好五十蚊，加上是陳慧的fans，本來一定揀呢本的，最衰揭了兩頁《俗》，講左少少Wyman在圈內見到的八卦事，結果八婆心理下，買了這本六十蚊的，反正陳慧的書，我總會買的。
購物的確是一件令人欣喜的事，很滿足於那種左揀右揀，左摸右摸才決定買甚麼的過程，買完書去Ikea，見到很多東西都想買，不是銀包不爭氣，可能會一次過買齊，最後只揀了一個大大的硬卡紙盒，買回家裝東西，已經很滿足，購物慾極高的我，難怪到現在也儲不到錢，還未揀到心水新波鞋呢……嘻嘻！

明哥

2006-03-12T23:38:00.000+08:00

星期五晚，去了聽黃耀明ｘ港樂，第四次聽港樂，都知道氣氛不會像平日的演唱會那麼高漲，但明哥依然有方法打破定律，衣服固然很搶眼，加入少量電子音樂，出奇地與管弦樂超夾，令演唱會不會太悶；加上不少歌曲在演唱前，明哥會先說明揀選的原因或背景，當中不少都與管弦樂及歐洲音樂扯上關係，聽歌時感受更深、更踏實。最正當然係《春光乍洩》及《小王子》，原曲已經用管弦樂伴奏，不過在Studio時用合成器做，依家終於有真的管弦樂伴奏，層次感很不同，聽《小王子》時，也想起以前一個朋友，用這首歌來形容我，還要我用這首歌做鈴聲，可惜只用了九個月。
明哥整晚的聲線好靚，好聽過前年個唱時把聲，唱《罅隙》及《如果你愛我》，感覺超正，聽到有點毛管戙，特別鍾意《罅隙》，首歌本身很難唱，但明哥演譯得極好，100分，聽到歌詞「我跟你　不信不能　我終有一天支配你的心情」，touching到不得了，但我真的有能力支配到嗎？

我愛三眼仔

2006-03-06T16:14:00.000+08:00

部份三眼仔藏品

熟朋友及同事都知道，我超級超級鍾意《反斗奇兵》裡面的三眼仔（送禮物給我最好就買佢啦），屈指一數，已經鍾意了差不多七年（原來《反斗奇兵》今年都十週年），由無人知道三眼仔係乜，到依家周街都係三眼仔，結果……就係愈買愈多，有段時期更限制自己每月只可買一件三眼仔精品，不過後來演變到每月最少買一件，死未？最恐佈係睡床上也有三眼仔俾我攬，完全不像男孩子的睡床，同事們聽到也嚇了一跳。
半年前，覺得精品太多，除了部份放在公司等自己可以對住做野外，在家的也大大話話也有二百件，於是用了一個「日」字型木櫃放好它們（幸好大部份都係細件的精品），但木櫃本身沒有門，嚴格來說只是一個木架，所以又再買了一卷包書膠紙，封在前面擋塵，像是很有系統，哈哈！不過最近已開始出現滿座的危機，再買就放不下了，連早前在香港迪士尼買的，也未有空間放進去，噢，怎辦？

放完假

2006-02-01T10:49:00.000+08:00

1月14號開始放大假，放到今日，十八日，終於返工，成個假期無去旅行，無接外稿做，本應好悠閒，但唔知點解，好似仲辛苦過返工，日日都有好多節目，搞到個人體力透支，尋晚仲終於病左，無端端發高燒，死未？好彩今日已經病好，唔係就慘喇！
原本今個星期要交稿，點知死好命改遲了，下星期一先交，睇黎今個星期都係無野做的多，而且還有極極極嚴重holiday mood，想叫我做野都難，嘻嘻……
尋日同舅父飲茶，講講下話題變左公民教育，佢話有次去日本旅行，一早起身見到有個日本小朋友返學，想過對面馬路，由於太早的關係，加上是一條小路，路面根本無車，只要直行過對面就可以了，但他偏偏要走到老遠的斑馬線，過到對面後再行回頭路，舅父話如果是香港的小朋友，根本就不會這樣做，我心裡面想，不是小朋友不做，而是大人不教，甚至不守規則的是大人本身，不要說過馬路，就算是上地鐵，也爭先恐後，甚至叫小朋友跑入去先霸位，舅父話呢個現象，相信幾十年後還是會一樣，跟住大家齊齊嘆一口氣……到底他日我的小朋友又會怎樣，就算教好了，又會否受社會的歪風影響，教也教不來呢？真的不敢想。