台中的日出

上上星期去了台灣環島遊，返來就只有忙忙忙，每次放完假總是這樣，今個星期先有時間看看拍下的相片，估不到人生到了三字頭，才第一次看日出，雖然很倦和很冷（阿里山頂只有六、七度），但是當見到日頭走出來時，心情真的極之興奮，尤其是導遊話七團先有一團見到日出，其餘只見到雲海，就更覺得這個日出得來不易，不過要四點起身，下次還是要考慮一下。

最能夠牽動情緒的五首歌

第一次俾人點中玩blog tag，就被兩個人（傳說中的地通拿及Noddy）點到，唔玩都唔得啦！不過要揀五首歌，絕對不是易事，於是快快打了這段文就算，我驚多想就會改變主意，個人實在太易聽歌時「毛管戙」，亦易哭（男仔都算少見），想了一會就揀了下面五首：

1.《如何掉眼淚》　鄭秀文
「明明暗地裡是愛到要死　偏要扮成二人是知己
　………
　如何掉眼淚　讓哭找不到根據
　這愛情沒你准許　笑我沒有這資格」
聽一首歌感動一定是有一個故事，《如何掉眼淚》固然好聽，但歌詞太到肉，就是自己一段陳年往事的寫照，當年也有將歌詞email給她，不知她現在聽到這歌時會有甚麼反應。至少我事隔多年，每次到卡拉OK聽到別人唱，心裡面也不好受。

2.《左右手》　張國榮
「不知道為何你會遠走
　………
　怕這雙手一失去你　令動作顫抖
　………
　習慣都扭轉了呼吸都張不開口
　你離開了　卻散落四周」
哥哥走了之後，每次到卡拉OK點唱演唱會版的《左右手》，都有淚水走出來，見到的畫面，就是我最後一次見到他的畫面，很感觸，直到兩年多後的今天，情緒才穩定了一點，至少可以在K唱得完這首歌。

3.《單車》　陳奕迅
「難離難捨，想抱緊些，茫茫人生，好像荒野。」
歌詞本身寫得好好，Wyman填得很感動，不過揀呢首歌係因為太后大人話我第一次同佢唱K，我第一首唱的歌就是這一首，俾面太后大人，當然要揀啦！

4.《如果你愛我》　黃耀明
「知不知這份愛搖動時 便發現心的層次
　這關係 今天美麗未如從前 還有沒有意思」
所有明哥的歌都喜歡，但這一首感覺最正，曲詞出色，上次碰到大學的師妹，她說這首歌的句子結構很特別，「你」字與「我」字用得很出色，我唔明，只係覺得好正。（附註：上年聽明哥演唱會，at17結他伴奏唱這首歌一次，又有另一番感覺，一樣咁正！）

5.《飄飄飄飄》　陳奕迅
「飄飄飄飄進愛的海 然後以後離不開 你贈誠實的愛」
第一次聽陳奕迅演唱會，也是唯一一次和她聽演唱會，於是整個演唱會都聽不入耳，只是留意她的反應，浪費了！不過很記得Eason有唱這首歌，還和《星晴》mix埋一齊唱，好正！

好！分享完，輪到我點人：
Polly's Honey
noonspace
Gold Chan
tusswu
marcovaldobb

地道Blogger調查

響應網友呼籲，如果閣下是本地的Blogger，請按下面連結填寫這份問卷，為此調查出一分力。我已經填了，只花分半鐘，很快就能完成的，放心！

吹脹

當老細叫你做一些不太make sense的東西時，你會怎辦？在這機構四年多，自己就遇上過不少這樣的情況，最慘是篇稿最後刊出的是自己名字，於是別人看起來，就會以為不make sense的，是我，沒人會想到後面策劃的是誰人。有行外朋友問：你做甚麼題目，不是自己決定的嗎？我立即苦笑，反問：你平日的工作，難道是自發要做，不是老細指派的？他們以為做記者的，就有很大的自由度，與他們的工作性質會完全不同，哎……是這樣就好了。
最近又出現「不make sense事件」，事緣自己想做DV機比併，誰知老細「聰明地」認為，DV機已經無人用，個個都拎住部數碼相機拍片的啦，於是命令我借一部DV機回來，同其他數碼相機比併，目的係笑DV機價錢貴，但係拍出來的效果其實同數碼相機差唔多。我聽完已經一額汗，結果比併完，DV機根本唔係咁差，於是老細進一步發揮，話DV機梗係拍到片，但係數碼相機平一倍，又拍到片又影到相，DV機就唔得，所以叫我比併埋DV機的影相功能，夾硬做到有分別。最慘係佢見到J字牌子的新DV機廣告，就指明話要借呢部，人家只得130萬像素，影相梗係輸九條街，結果篇稿出左，我亦俾J牌子的PR追了九條街……來罵，都唔知點同佢交代。
各位路過的仁兄，相信都有遇過類似事件，有任何好建議的請留低comments，謝謝！

別了

別矣，我親愛的同事，你的離去，雖然令人很不捨得，共事了四年多，與你最多偈傾，但是能離開這間公司，這個行業，是天賜給你最大的福氣，應該替你高興才對，希望新環境你會適應，事業更上一層樓。

暢遊迪士尼

十二號，迪士尼開幕，奉命入園做野，未入園前幾日，已經開始驚：到底咁多人迫，做唔做到野？我名攝影師死諗的安排，到底可唔可以如願完成？會唔會真係連水都唔俾帶？我帶咁多相機入去，會唔會唔俾入？

結 果……一切超乎想像咁順利，樂園好想像中咁細咁迫，服務員亦比想像中態度好200%，我唔鍾意米奇米尼Winnie the Pooh，入到去一樣好開心，完全感染到樂園帶俾人既歡樂，無報紙雜誌講得咁衰。當然可以同兩位靚model玩足成日八粒鐘，想唔開心都幾難，尤其同Crystal玩迴旋木馬，一路玩一路影，開心死！

最不愉快，係撞到大陸遊客，排隊時不停打尖已乞人憎，男人老狗，居然為左玩木馬，將個小朋友推落黎，自己坐上去，係唔係人黎架？

唱K

呢幾個月唱K都幾開心，新歌多得很，仲有好多都係好聽的，之前有側田的《好人》，上次去唱就終於有Eason《浮誇》，開心到呀……我唱了兩次，無想像中咁難唱，當然亦無Eason唱得咁好。尋日本來諗住去唱葉宇澄《瑪莉與偉業》，點知朋友仔唔舒服，要星期四先唱到……不過葉宇澄真係唱得好好，連唱現場都表現穩定，上次去睇新城國語力頒獎禮，佢有份唱一段，好穩定，今年的新人真係好得，希望佢keep到落去啦！

再遇

收到老死的喜帖，開心到不得了，終於結婚了，感動得有點想擁著他哭。隨口問他會請甚麼人，他很小心數算了出來，最後才數到「她」，當時的感覺是，噢！會見到「她」，還沒有甚麼；後來回到家無聊自諗，見到面應該講乜，應該打招呼嗎？「她」會理睬我嗎？「她」還會很介意嗎……可能是我想多了，可能到時就沒有甚麼，但是心裡還是有點不安，四年沒見了，還好嗎？見到面時，還可以問「還好嗎」，不知道，到時才算吧！

買樓

今期《壹周刊》訪問胡恩威，胡概嘆香港「多數人用一半收入供一層無風、無景觀、樓底矮、窗台大過廳的樓」，係囉，點解要買樓呢？點解結婚一定要買樓呢？點解有樓先係有固定經濟基礎呢？點解買股票係投機，買樓就會令人覺得生活安定呢？結果所有人為了層樓勞碌一生，唔敢轉工、轉行、轉變生活……為乜？

好彩依家俾千幾蚊同人夾份租樓，樓底高過兩個人疊起，無窗台，有山景，落街仲可以睇到煙花，不知幾開心，得閒仲可以呼朋喚友開party打麻雀，做乜要買樓？

想死

四個細路迫在一間只有二百多呎的cafe內困獸鬥，仲要試六部數碼相機，總要每個細路最少有一個家長跟身，感覺只有一個：想死！