浮誇

好好聽，雖然未到12首歌都好好聽既地步，但真係好好聽，好陳奕迅，新四大天王，無個夠佢好，最多得梁漢文拍得住。當然鍾意《夕陽無限好》，但更鍾意《浮誇》，曲詞都正到爆！

浮誇

歌手：陳奕迅
作曲：C Y Kong

填詞：黃偉文
編曲：C Y Kong

有人問我　我就會講　但是無人來
我期待　到無奈　有話要講
得不到裝載　我的心情猶像樽蓋
等被揭開　咀巴卻在養青苔

人潮內　愈文靜　愈變得　不受理睬
自己要攪出意外　像突然地高歌
任何地方也像開四面台
著最閃的衫　扮十分感慨
有人來拍照要記住插袋

＊你當我是浮誇吧　誇張只因我很怕
　似木頭　似石頭　的話　得到注意嗎
　其實怕被忘記　至放大來演吧
　很不安　怎去優雅
　世上還讚頌沉默嗎　不夠爆炸
　怎麼有話題　讓我誇　做大娛樂家＊

那年十八　母校舞會　站著如嘍羅
那時候　我含淚發誓各位　必須看到我
在世間　平凡又普通的路太多
屋邨你住哪一座

情愛中　工作中　受過的忽視太多
自尊已飽經跌墮　重視能治肚餓
未曾獲得過便知我為何
大動作很多　犯下這些錯
搏人們看著我　算病態麼

REPEAT＊

幸運兒並不多　若然未當過就知我為何
用十倍苦心　做突出一個
正常人夠我富議論性麼

你　叫我做浮誇吧　加幾聲噓聲也不怕
我在場　有悶場的話
表演你看嗎　夠歇斯底里嗎
以眼淚淋花吧　一心只想你驚訝
我舊時似未存在嗎　加重注碼
青筋也現形　話我知　現在存在嗎
凝視我　別再只看天花

我非你杯茶　也可盡情地喝吧
別遺忘有人在　為你聲沙

嚇死

嘩嘩嘩！咁樣既ThumbDrive都有既，袋住成隻手指出街，會唔會俾差人拉O架？只得128MB，但係賣60歐元，傻O左！但係都幾好笑，如果香港有得賣，都可能買支過癮下。

來源：http://www.akihabaranews.com/en/news_9754.html

點解

作為香港頭號對抗政府刊物的記者，基本上每日返工都精神分裂。表面睇本雜誌好正義，樣樣在市民方面諗，花盡心思挖出社會醜惡面，直情係大家既朋友咁，結果裡面既人做事方式，似足香港政府。

好似期期鬧政府，對某某官員偏私，或者某某官員有特權，公器私用，誰知我地雜誌就專製造「特權人士」；如果你係某某總編輯既老婆，你好彩喇，今朝無返工原因（同埋晏晝早退既原因）可以係set頭／整車／帶隻狗睇醫生／尋晚睇波太夜訓／屋企跳Fuse，甚至係「老公未返工，無人車我返工」！

間唔中敝刊會話邊個係政府既「應聲虫」，唔好信佢，如果係議員既話，下次投票更加唔好投佢，點知我公司一樣有成堆「應聲虫」；每日最叻陪老細食飯／夠老細吹水／第一時間幫老細買想要既野／老細無返工頂佢開會／擦老細鞋擦到出面……等等，似足太監，於是佢高薪厚識，唔識野都可以拎幾皮野人工，明明係自己負責既版面，唔識做既／豬頭骨就交俾下屬，連帶佢老婆都享有特權，記者一個居然唔駛編輯睇稿，話佢夠能力自己edit（咁其他記者點解又唔得），但係每次都錯漏百出。

又好似雜誌好鍾意鬧官員推卸責任，明明文件一定經過佢手，佢都可以話自己太忙無睇過，所以唔關佢事；公司裡面亦一樣，高層係唔會錯既，錯既一定係記者，就算份稿佢睇過N次，錯既時候就一定係記者無check清楚，咁點解佢仲要睇？當然每次佢睇稿，都要你改到合佢心水先至得，不過每次例牌係無sense，兼貽笑大方的，但你都要改，仲要份稿出你個名，吹脹！

仲有，雜誌成日話某議員／商家同官員其實好熟，所以成日勾結獲利；對唔住，咁樣做在本集團根本無錯，除了記者外，甚麼高級記者、編輯、執行編輯、副老總、老總……都與上一級或上上一級有關係的，無關係的，一係就轉工唔做，一係做死一世記者，試過有人與老細關係良好，一年內連升兩級，人工仲……

諸如此類事件，多不勝數，於是你每日鬧政府，但又同情政府，因為天下烏鴉一樣黑，同行家講起，佢會話「O車！你人工高咁多，有乜所謂呀！」如果有得揀，我寧願收少d，但係做返一個真正既記者，面對實事求事既老細，不過出道到依家，已經轉了六間不同的報刊，我開始懷疑未必真係有得揀。

喊（續）

上星期六陪女友細妹睇莫文蔚演唱會，本來沒有甚麼期望，誰知又幾好睇，Karen唱Live也OK，難怪在台灣可以那麼紅。最高興的莫過於最尾有Eason做嘉賓，唱了三首歌，好好聽，女友最開心反而係中間有吳彥祖伴舞，一除衫成班女仔就尖叫，唔知有乜好睇。

不過睇到中間，就真係唔開心，其實入場坐低，唔知點解，心裡面已估Karen會翻唱張國榮既歌，結果真係翻唱「儂本多情」，已經聽到眼濕濕，但點知唱完仲用投影機，做到與哥哥同台演唱的效果，一齊合唱「只怕不再遇上」，見到哥哥唔多清楚既影像，眼淚就已經控制唔住，完全崩潰，好殘忍呀，做乜要咁做整喊人，老實講，有點不悅。

早兩期《壹周刊》，李碧華在專欄內，講起哥哥的舊事，睇完，又眼濕濕，事隔兩年，還抹不走那一絲絲的傷感，刻意不去任何紀念活動，不想自己傷心，還是會想起，還是會傷感，很想重看「霸王別姬」，很想重看「胭脂扣」……

李碧華專欄原文：

記得某一個夜晚，那時張仍精神亢奮要當導演。在他家有個露天的庭院，我們喝 茶，他用文華美味的巧克力來招待（後來，自文華縱身一跳……）。夜涼如水，他告訴我：「昨天阿梅打電話哭訴，又嚷著自殺。她天天都說自殺，我罵她，你如果不振作，便去死吧！」我道：「其實我很感謝你，也很感謝阿梅，一個蝶衣，一個如花，沒有人可以代替。」

蝶與花，淒艷、迷人、短暫、虛幻。誰知後來，那天天想自殺的竟堅強地以癌症病體支撐最後演唱會，燦爛到生命盡頭，意志力令人感動。那對未來充滿憧憬的，卻自殺了。

一陣風，一縷煙，一撮灰，一聲嘆息，一個模糊的影子……

喊

好耐無試過睇戲會喊，對上一次好似已經係AI，都聽過好多人講《藉著雨點說愛你》好喊，一路都未有時間睇，結果星期日先睇到，怕且都就黎落畫，所以戲院只演一場。雖然之前唔小心，已經在其他人的blog睇到劇情，但係照睇一次，依然感動，我已經keep到最尾先喊，左右隔離好多早過我喊，好正好有味道，而且就算加左穿越未來既橋段，都唔覺得犯駁或者唔合理。片頭有《擁抱這分鐘》，好似好慘，但係提唔起興趣，韓片只係識用絕症催淚，無日本片咁有劇情，咁有味道，多些這類片上畫就唔駛怕BT啦！

終於買了...

等了30日，由到玩具反斗城訂貨，到尋日拎機，足足期待了30日，雖然尋晚只係玩了一會（因為無電，要差電），但已經好開心，但係買機主因都係為了玩NBA，點知隻Game麻麻地，依家仲考慮緊好唔好再花三百大元再買NBA Street Showdown，始終玩開EA Sports較有保証，不過買機已經傾家蕩產，就算買，都唔會今個月買，唯有捱住隻NBA先啦。

不過最激氣係隻Ridge Racer，因為係行貨Game關係，所以同所有同事既水貨版對戰不到，買機前已經聽講過，點知今日拎返公司試，先知係事實，哎...好彩自己唔多喜好賽車Game。呢排相信都會沉迷玩機，我睇了好耐都仲未睇完既書，睇怕又要放低一排，嘻！

麥嘜襟章

早幾年，M記快餐店換麥嘜公仔，已經傻左咁食，連食四星期換公仔，今次仲恐佈，30個襟章，目的係換死人為止，講明買滿$20先有一個，多過$20都係得一個，就算買滿 $40都唔會有兩個，離譜！於是一日分開幾次幫襯，每次都要買到岩岩好$20多少少先開心，難過食飽換公仔多多聲。

上星期最激氣，諗住買三支汽水湊夠數，點知去到收銀先知$19.5，即場想打爆部收銀機，左度右度，結果買左收銀機隔離十蚊兩排朱古力，足足比「目標價」貴了$9.5，後來先醒起可以買包Tempo搭救，呻笨！

今日上拍賣網，已經出現交換潮，個個都係寫「我有ABCGHJKLOP，想交換DESTUW……」之類的字眼，於是攤開自己的存貨，將多餘的篩選出來，再對 一對有誰的交換條件最岩自己，結果對了成個小時，眼中只有字母走來走去，想嘔！對岩字母，仲要睇埋交收地點，唔係屯門就係葵涌，我頂！結果得一個肯郵寄交收，想要襟章之嘛，仲慘過返工。奉勸大家下次換野，諗過度過至好。

大家好

見人寫blog，自己又想試下，雖然性格超懶，希望一星期都寫到一次啦！多多捧場！