1月14號開始放大假，放到今日，十八日，終於返工，成個假期無去旅行，無接外稿做，本應好悠閒，但唔知點解，好似仲辛苦過返工，日日都有好多節目，搞到個人體力透支，尋晚仲終於病左，無端端發高燒，死未？好彩今日已經病好，唔係就慘喇！
原本今個星期要交稿，點知死好命改遲了，下星期一先交，睇黎今個星期都係無野做的多，而且還有極極極嚴重holiday mood，想叫我做野都難，嘻嘻……
尋日同舅父飲茶，講講下話題變左公民教育，佢話有次去日本旅行，一早起身見到有個日本小朋友返學，想過對面馬路，由於太早的關係，加上是一條小路，路面根本無車，只要直行過對面就可以了，但他偏偏要走到老遠的斑馬線，過到對面後再行回頭路，舅父話如果是香港的小朋友，根本就不會這樣做，我心裡面想，不是小朋友不做，而是大人不教，甚至不守規則的是大人本身，不要說過馬路，就算是上地鐵，也爭先恐後，甚至叫小朋友跑入去先霸位，舅父話呢個現象，相信幾十年後還是會一樣，跟住大家齊齊嘆一口氣……到底他日我的小朋友又會怎樣，就算教好了，又會否受社會的歪風影響，教也教不來呢？真的不敢想。
